Zer da?
Eman minutu 1 BAKEA
2010ean UN Etxea –UNESCO Sustatzeko Euskal Herriko Elkarteak martxan jarri zuen “Eman minutu 1…” ikus-entzunezko lanen lehiaketa. Honen helburua, mundu mailan giza eskubideekin zerikusia duten arazoei buruz gizartea sentikor bihurtzea eta kontzientzia zabaltzea da.
“Eman minutu 1…” lehiaketaren irabazleak izango dira ikus-entzunezko lan onenak eta giza eskubideak hoberen defendatu, bultzatu, aldarrikatu, zabaldu eta kontziatzen dutenak.
Edizio bakoitzean, lehiaketak gai desberdin batean jartzen du arreta.
2024an, XV. edizioan, lehiaketak “Eman minutu 1… BAKEA” izena hartzen du.
Edizio honetan minutu bateko bideorik onenak sarituko dira, bakearen aldeko giza eskubidea, bake-kultura, indarkeriarik eza sustatzeko hezkuntza zeregina eta gatazkak modu baketsuan konpontzeko konpromisoa defendatzen, sustatzen, aldarrikatzen, zabaltzen eta/edo kontzientziatzen dutenak.
Gatazka bortitzen uholdea dago munduan, intolerantziaren eta diskriminazioaren gorakada kezkagarriarekin batera. Bereziki, gorrotoaren diskurtsoak forma arriskutsuak har ditzake, maila pertsonalean kaltea eragin eta taldeen aurkako indarkeria bultzatzeaz gain, inklusioaren, aniztasunaren eta giza eskubideen aurkako erasoak ere badira.
Testuinguru horretan, bakearekiko konpromiso aktiboa inoiz baino premiazkoagoa da. Konpromiso horrek segurtasun- eta defentsa-neurrietatik harago joan behar du, gatazkak prebenitu edo geldiarazteko, bakea ez baita hasten indarkeria amaitzen den tokian. Bakeari eusteko, gobernantza inklusibo, demokratiko eta parte-hartzailearen, elkarrizketaren, elkartasunaren, elkar ulertzearen eta lankidetzaren, garapen iraunkorraren, genero-berdintasunaren eta giza eskubideen eta oinarrizko askatasunen gauzatze orokorraren oinarri sendoak behar dira.
Hezkuntzak funtsezko zeregina du ahalegin horretan. (UNESCOko zuzendari nagusiaren mezua, Hezkuntzaren Nazioarteko Eguna dela eta: Bake iraunkorrerako ikasi, 2024)
Interneteko algoritmoek sare sozialak gero eta gehiago erabiltzen dituzte diskurtso zatitzaileak eta gorrotozkoak zabaltzeko “arma” gisa. Horrek areagotu egin du pertsona eta komunitate ahulenek aurrean duten estigma, eta mundu mailako gure demokrazien hauskortasuna azaldu du. Online gorroto-edukia ugaritzearekin batera, desinformazioa areagotu egin da, eta erraz parteka daiteke tresna digitalen bidez.
Epaimahaiak bereziki baloratuko ditu:
- Bakearen kulturari, indarkeriarik eza sustatzeko hezkuntzaren zereginari eta gatazkak modu baketsuan konpontzeko konpromisoari buruzko hausnarketa egiten duten bideoak.
- Giza eskubideak sustatzen, babesten eta konprometitzen dituzten bideoak.
- Inor atzean utzi gabe, inor kanpoan utzi gabe, etorkizun iraunkorra eraikitzen lagunduko duten bideoak.
- Desberdintasun eta aniztasun kulturala, soziala, identitarioa eta generokoa onartzea eta gizarteratzea.
- Pertsonek beren eskubideak banaka edo taldeka eskatzeko dituzten gaitasunak eta estrategiak ikusaraztea.
- Gizartea mundu bidezkoago, inklusiboago, bidezkoago eta iraunkorrago baten aldeko borrokan inplikatzea.
- Genero-berdintasuna eta emakumeen ahalduntzea defendatzen duten bideoak.
- Ez da tonu, paternalista, biktimizatzaile eta sentsazionalistarik erabiliko.
Gogoratu: izena emateko eta bideoak bidaltzeko epea 2025eko urtarrilaren 31ra arte egongo da zabalik. (egun hori barne).