Planetari argia eman

Naiara Nájera Etxeandia.
Zuzenbidea eta komunikazioa graduko ikaslea. Deustuko Unibertsitatea. Donostiako Campusa.

Egungo energia-eredua jasanezina da. Eredu garestia eta ingurumen-inpaktu handikoa da, eta, gainera, etengabe hazten ari den energia-kontsumoa du ezaugarri.

Aitor Urresti UPV/EHUko Ingeniaritza Energetikoaren Saileko irakasleak dioenez, «Berotegi-efektuko gasen emisioak handitzen doazen heinean, gero eta eragin handiagoak nabarmentzen dira munduko sistema klimatikoan, eta hori gure ingurunean ere nabari daiteke. Emisio horiek murrizteak eta ezabatzeak aldaketa garrantzitsuak eskatzen ditu gure gizartean, eta, bereziki, energia-sistemaren erabateko aldaketa. Zoritxarrez, gure gizartearentzat energia oinarrizko baliabidea da, baina gure energia-kontsumoa erregai fosiletan oinarritzen da ( % 86 mundu mailan, % 78 nazio mailan), eta horiek erretzean sortzen diren berotegi-efektuko gasek klima-aldaketa areagotzen dute. Areago, erregai fosil horien agortzea gero eta argiagoa da, batez ere petrolioaren eta gas naturalaren kasuan .»

Energia iraunkorra da energia eskubidea bermatu ahal izateko dugun aukera bakarra, planeta arriskuan jarri gabe, eta herritarren eta etorkizuneko belaunaldien ongizatea bermatuko duen energia-eredu berri bat lortzeko. Nazio Batuek adierazten dutenez, munduko biztanleen % 13k oraindik ez du elektrizitate-zerbitzu modernoetarako sarbiderik, eta 3.000 milioi pertsona zuraren, ikatzaren, egur-ikatzaren edo janaria prestatzeko eta berotzeko animalia-jatorriko hondakinen mende daude. Halaber, lokal itxietako airearen kutsadurak, etxeko energiarako erregaiak erabiltzearen ondorioz, 4,3 milioi heriotza eragin zituen 2012an; 10etik 6 emakumeak eta neskak izan ziren.

Egoera hori arintzeko, Nazio Batuek energia eskuragarriaren eta ez-kutsatzailearen aldeko apustua egin zuten 7. garapen jasangarriko helburu gisa. Horrela, energia-zerbitzu eskuragarri, fidagarri eta modernoetarako sarbide unibertsala bermatuko duten ekintza-ildoak sortu nahi dira, energia berriztagarriaren proportzioa eta energia-eraginkortasuna nabarmen handituko dira, nazioarteko lankidetza handituko da energia garbiari buruzko ikerketarako eta teknologiarako sarbidea errazteko, azpiegitura zabalduko da eta teknologia hobetuko da garapen bidean dauden herrialdeetan guztientzako energia-zerbitzu moderno eta iraunkorrak eskaintzeko.

Horrela, ezinbestekoa da energia unibertsal eta segururako sarbidea sustatzea, baina planetaren eta etorkizuneko belaunaldien ongizatea arriskuan jarri gabe.

Hona hemen ODS7 azaltzen duen bideo bat:

Naiara Nájera Etxeandia.
https://es.linkedin.com/in/naiara-n%C3%A1jera-etxeandia-474008209

Argazkia: Sustainable Energy for All (SEforALL)